7 наурыз күні Кеншілер мәдениет сарайында Қарағанды облысы әкімінің қатысуымен «Әлемді жүрегімен әлдилеген» атты 8 наурыз – Халықаралық әйелдер күніне арналған мерекелік концерт өтті.
Концерт барысында Қарағанды облысы әкімінің атынан нәзік жандыларға құрмет көрсетіліп, салтанатты түрде гүл шоқтары табысталды. Жиналған қауымға керемет көңіл-күй сыйлаған бұл кештің жүргізушісі – ҚР еңбек сіңірген қайраткері Нұрлан Абдуллин болды.
Концерттік бағдарламада Қ.Байжанов атындағы концерттік бірлестіктің кәсіби ұжымдары, Қарағанды Академиялық музыкалық комедия театрының әртістері, «Шолпан» және «Қуаныш», «Аққу» үлгілі хореографиялық ансамбльдері, Әсел Карабаеваның балалар вокалдық тобы, «ASTANA MUSICAL» Мемлекеттік театрының актрисасы Камилла Оспан, «Қазақстан дауысы. Балалар» жобасының финалисті, «Алашстар» халықаралық байқауының Гран-призері – Әнуар Берік, сондай-ақ кеш қонақтары Қазақстан эстрадасының жарық жұлдыздары – Бүркіт пен Айша өнер көрсетті.
Әсем ән мен көркем биден құралған әсерлі кеш көрермендерге ерекше көңіл-күй сыйлап, мерекелік атмосферамен өрбіді. Іс-шараны Қарағанды облысының мәдениет, архивтер және құжаттама басқармасы мен облыстық мәдени-сауық және халық шығармашылығының ғылыми-әдістемелік орталығы ұйымдастырды.
Көктемнің жарқын мерекесі нәзік жандылар қауымына арналған шынайы құрмет пен өнердің биік шыңын көрсеткен тамаша мәдени шара болды.
